COPD: Sèvi ak ponp

Yo pran kèk medikaman kont COPD gras ak ponp. Ponp yo voye yon kantite medikaman ki doze nan poumon w yo. Tout ponp yo pa fonksyone menm jan. Mande founisè swen sante w la kijan pou w itilize ponp ou an.

Itilize ponp ki doze ak tib yo (MDIs)

Yon ponp ki doze ki voye yon kantite medikaman nan poumon w. Ou dwe rale medikaman an byen fon nan poumon w pou l fè efè. Ponp ou an gen yon tib. Se yon tib ant ponp lan ak bouch ou. Tib la ogmante kantite medikaman ki ale nan poumon w yo.

Men kijan pou w itilize yon ponp ki gen tib.

1. Premyèman, lave men w. Itilize savon ak dlo trete k ap koule. Apresa, verifye dat ekspirasyon an ak kontè ki sou ponp lan. Asire w ponp lan toujou gen dòz ki rete ladan l. Epitou verifye si kànèt an metal la byen rantre anndan po plastik la.

2. Retire bouchon ponp lan. Souke ponp lan plizyè fwa.

3. Si se premye fwa w ap itilize ponp lan, ou dwe prepare l. Sa vle di asire w li pare pou w itilize l. Swiv enstriksyon fabrikan an yo. Flite ponp lan nan lè a lwen figi w. Ponp lan pare pou w itilize l kounye a.

4. Apresa, retire bouchon an epi gade anndan tèt tib ki pral nan bouch ou a pou w asire w li pa gen anyen ladan l (tib la).

5. Kole tib la nan ponp lan. Retire bouchon an nan pati tib ki pral nan bouch ou a.

6. Vide poumon w yo nèt lè w rale yon gwo souf, kage tèt ou yon ti kras dèyè, epi soufle lè a deyò.

7. Mete tèt tib la nan bouch ou, nan mitan dan w yo ak sou lang ou. Asire w lang ou pa bouche ouvèti pati tib ki pou ale nan bouch ou a. Fèmen po bouch ou byen sere otou l pou w byen fèmen l.

8. Si w ap itilize yon tib ki gen yon mas, asire w kapichon an kouvri nen w ak bouch ou. Pa ta dwe gen okenn espas ant po w ak mas la.

9. Asire w ou kanpe oswa chita dwat sou yon chèz. Toujou soulve babin ou.

10. Peze bouton ponp lan 1 fwa pou medikaman an soti. Apre sa, respire dousman epi pwofondman jiskaske tout medikaman ki nan tib la disparèt, oswa jan founisè swen sante w la di w pou fè sa. Si tib ou a tou gen yon siflèt ladan l, tande bri siflèt la vle di w ap enspire twò vit.

11. Retire pati tib ki pou al nan bouch ou a epi fèmen bouch ou.

12. Kenbe souf ou pou jiska 10 segonn, si w kapab. Apresa, ekspire dousman nan bouch ou.

13. Refè etap sa yo pou chak boufe medikaman. Rete tann omwen 15 segonn pou rive 1 minit anvan w pran lòt boufe a, oswa osi lontan yo mande sa.

14. Si w ap itilize yon ponp estewoyid, rense bouch ou epi gagare dlo nan bouch. Yon fason pou evite kandidoz, yon enfeksyon chanpiyon (chank). Krache dlo a deyò. Pa vale dlo a. Si w te itilize yon mas, lave figi w, espesyalman alantou bouch ou ak nen w, ak dlo tyèd pou w evite yon gratèl sou po w.

15. Netwaye ponp ou an ak tib ou a apre chak itilizasyon oswa omwen yon fwa pa semèn oswa jan moun ki fè aparèy la endike pou fè sa.

Sèvi ak MDI san tib yo

Yon ponp ki doze ki voye yon kantite medikaman nan poumon w. Ou dwe rale medikaman an byen fon nan poumon w pou l fè efè.

Si ou pa sèvi ak yon tib, swiv etap sa yo:

1. Premyèman, lave men w. Apresa, verifye dat ekspirasyon an ak kontè ki sou ponp lan. Asire w ponp lan toujou gen dòz ki rete ladan l. Epitou verifye si kànèt an metal la byen rantre anndan po plastik la.

2. Retire bouchon an nan tèt ponp lan. Souke ponp lan plizyè fwa.

3. Si se premye fwa w ap itilize ponp lan, ou dwe prepare l. Sa vle di asire w li pare pou w itilize l. Swiv enstriksyon fabrikan yo. Flite ponp lan nan lè a lwen figi w.

4. Ponp lan pare pou w itilize l kounye a.

5. Founisè swen sante w la ap di w si w dwe itilize metòd bouch fèmen an oswa metòd bouch louvri a.

6. Vide poumon w yo nèt lè w rale yon gwo souf epi kage tèt ou yon ti kras dèyè epi soufle lè a deyò.

7. Pou metòd bouch fèmen an, mete pati ponp ki pou ale nan bouch la, nan mitan dan w yo ak sou lang ou. Fèmen bouch ou byen sere alantou bouch la pou fèmen l byen di pou medikaman an pa flite nan je w.

8. Oswa, pou metòd bouch ouvè a, kenbe ponp lan anlè bouch ou, ak pati ki pral nan bouch ou a nan yon distans 2 pous ak bouch ou.

9. Asire w ou kanpe oswa chita dwat sou yon chèz. Toujou kenbe ponp lan nan nivo babin ou.

10. Peze bouton ponp lan 1 fwa pou medikaman an soti. Nan menm moman an, respire pwofondman epi dousman pou 3 a 5 segonn.

11. Retire pati ki pou al nan bouch ou a nan bouch ou si w ap itilize metòd bouch fèmen an. Oswa, deplase l lwen bouch ou si w ap itilize metòd louvri bouch la. Apresa, fèmen bouch ou.

12. Kenbe souf ou pou jiska 10 segonn, si w kapab. Apresa, ekspire dousman nan bouch ou.

13. Refè etap sa yo pou chak boufe medikaman. Rete tann omwen 15 segonn pou rive 1 minit anvan w pran lòt boufe a, oswa jan founisè swen sante w la mande sa.

14. Si w ap itilize yon ponp estewoyid, rense bouch ou epi gagare dlo nan bouch ou pou evite kandidoz, yon enfeksyon chanpiyon (chank). Krache dlo a deyò. Pa vale dlo a. Netwaye ponp ou an apre chak itilizasyon oswa pou pi piti yon fwa pa semèn. Oswa netwaye l jan fabrikan aparèy la mande pou w fè sa.

Sèvi ak yon ponp poud sèk (dry-powder inhalers, DPIs)

Gen kèk ponp ki sèvi ak ti grenn an poud pou bay medikaman an. Sa yo pa bezwen tib. Yo souvan gen kontè ki mezire konbyen dòz ou itilize. Ponp poud sèk yo, tankou diskèt oswa kòd, yo tout pa travay menm jan. Asire w ou konnen kijan pou w itilize pa w la kòrèkteman.

Men kijan pou sèvi ak diskèt ou a ou oswa kòd ponp poud sèk ou a

1. Premyèman, lave men w epi verifye dat ekspirasyon an.

2. Retire bouchon an epi kenbe ponp DPI plat la, tankou yon soukoup volan. (Si w ap itilize yon ponp kòd poud sèk (twist dry-powder inhaler DPI), retire bouchon an epi kenbe DPI a dwat, tankou yon fize.)

3. Chaje DPI a epi ajiste DPI a jan sa nesesè.

4. Pa souke DPI a.

5. Kanpe dwat oswa chita dwat sou yon chèz.

6. Pran yon gwo souf. Tèt ou dwe kage dèyè tou piti. Pouse lè soti deyò nèt pou vide poumon w yo. Pa soufle nan DPI a.

7. Mete pati diskèt ki pou ale nan bouch la oswa kab DPI a nan bouch ou. Fèmen po bouch ou otou li pou li byen sele.

8. Pran yon respirasyon rapid, pwofon, ak fòs nan bouch ou.

9. Kenbe souf ou pou jiska 10 segonn, si w kapab.

10. Retire DPI a nan bouch ou epi ekspire oswa pouse lè a deyò dousman. Mete fas ou lwen DPI a.

11. Rense bouch ou epi gagare bouch ou ak dlo tyèd si w respire yon medikaman esteroyid. Krache dlo a soti nan bouch ou pou w anpeche yon enfeksyon chanpiyon nan bouch (chank) yo rele l kandidoz.